Amerikanski forsetin, Donald Trump, sendir Ukraina tillukku við sjálvstýrisdegnum hjá landinum.
Á sosiala miðlinum X skrivar ukrainski forsetin, Volodymyr Zelenskyj, at hann "virðismetir heitu orðini" og takkar USA fyri at standa "øksl á øksl" við Ukraina.
Í dag eru 34 ár liðin, síðani Leonid Kravchuk, sum seinni skuldi gerast fyrsti fólkaræðisliga valdi forsetin í Ukraina, skrivaði undir ukrainsku sjálvstýrisyvirlýsingina.
- Tað er nú tíð at steðga vitleysu drápunum, skrivar Trump í sínum tillukku til Ukraina, sum Zelensky hevur deilt á X.
Trump hevur fingið ein stóran leiklut í royndini at fáa Ukraina og Russland undir samráðingar.
Seinastu vikurnar hevur hann havt fundir við Zelensky, evropeiskar leiðarar og russiska forsetan, Vladimir Putin. Men enn hevur ikki verið tosað um ein møguligan fund millum Putin og Zelensky.
- USA stuðlar einari samráðingaravtalu, sum kann føra til ein burðardyggan og varandi frið, sum ger enda á blóðbaðinum og tryggjar fullveldi og tign hjá Ukraina, stendur í brævinum frá Trump.
Zelensky deilir eisini brøv frá øðrum leiðarum.
Hetta er til dømis galdandi fyri kinesiska forsetan Xi Jinping og turkiska forsetan Recep Tayyip Erdogan. Teir báðir vísa sína gleði um samstarvið við Ukraina, men gera ikki beinleiðis áheitanir um at steðga krígnum á sama hátt.
Kanadiski forsætisráðharrin, Mark Carney, er komin til ukrainska høvuðsstaðin, Kiev, í dag á tjóðardegnum hjá fyrrverandi sovjetiska lýðveldinum.
- Hendan ukrainska sjálvstýrisdagin og hesa avgerandi løtuna í søgu teirra landi økir Kanada okkara stuðul og okkara felags átøk at fáa ein rættvísan og varandi frið í Ukraina, skrivar Carney á X.
/Ritzau/
