Fyrrapartin hava tey á Fiskamarknaði Føroya gjørt sínar metingar um ráfiskatilfeingið, sum er væntandi í næstu viku.
Her verður sagt, at ísfiskalínuskipið, sum plagar at vera úti, í løtuni liggur, men væntandi fer skipið avstað ein av næstu døgunum.
Tað eru bert fá eftir av teimum stóru ísfiskalínuskipunum, men vit hava nakrar smærri línubátar - ella stórar útróðrarbátar - við egningarmaskinu.
Línuflotin verður í mestan mun rikin við frystilínuskipum, sum eru fleiri í tali, og av hesum eru eisini fleiri til fiskiskap í løtuni.
- Seks frystilínuskip eru í løtuni undir Føroyum, eitt er á Flemish Kap, og eitt er á Grand Bank, sum eisini er á Ný Foundlands-leiðini.
Á Fiskamarknaði Føroya vita tey at siga, at frystilínuskipini fáa mest av toski og kalva.
Um útlitini til útróður í næstu viku verður sagt, at streymurin verður harður, men hann batnar, sum næsta vika gongur.
- Veðrið verður gott ein stóran part av næstu viku, og tí vænta vit, at nakað verður av útróðri.
Á Fiskamarknaði Føroya leggja tey aftrat, at útróðrarbátar hava brúkiligan fiskiskap, og soleiðis hevur eisini verið sagt um útróðurin seinastu tíðina.
