Tjóvar hava verið á gátt í tveimum handlum í vesturbýnum í Havn í nátt.
Beint eftir klokkan átta fekk løgreglan eina fráboðan um, at tjóvar høvdu brotið inn í Á-handilin við Landavegin. Løgreglan fór á staðið beinanvegin og løtu seinni kom kriminalpoliitið eisini á staðið.
Lítla løtu seinni, beint eftir klokkan hálvgum níggju, kom ein fráboðan frá amboðshandlinum Amboð.fo, sum liggur á J.C. Svabosgøtu í Havn um, at har høvdu óviðkomandi eisini verið inni.
Í báðum handlunum høvdu tjóvarnir brotið kassaapparatini upp og fingið fatur á vekslipengum. Talan er um nakrar túsund krónur tilsamans, sigur vakthavandi á løgreglustøðini í Havn.
- Í báðum handlunum hevur tað eydnast okkum at tryggjað bæði fingramerki og DNA, so vit hava góð spor at ganga eftir í málinum, sigur vakthavandi.
Seinastu vikuna hava fleiri innbrot verið eisini uttan fyri Havnina, til dømis í Kollafirði og í Vágunum, og tað er ikki heilt óhugsandi, at samband er millum innbrotini.
- Nú fáa vit at síggja, hvat víðari kanningar vísa, sigur vakthavandi.
