Tað er Jóhannis Joensen, løgtingsmaður fyri Javnaðarflokkin, sum hevur sett Súsonnu Bertholdsen, landssstýriskvinnu, ein grein 52a fyrispurning um fleiri kommunulæknar og heilsutænastur nærri fólkinum.
Ítøkiliga spyr hann soleiðis:
1. Hvussu gongur við ætlanini at styrkja heilsutænasturnar runt landið?
2. Hvussu nógv nýggj kommunulæknastørv eru sett í hesum samgonguskeiðinum?
3. Hvussu nógv kommunulæknastørv er ætlanin at seta í heyst?
4. Nær verður nýggja kommunulæknastarvið í Vágum sett?
5. Eru ætlanir um, at m.a. sálarfrøðingar verða partur av heilsutænastunum á heilsudeplunum í framtíðini?
Í viðmerking til fyrispurningin vísir Jóhannis Joensen á, at samgongan hevur sum mál at styrkja kommunlæknaskipanina og heilsuskipanir kring alt landið.
– Hetta er ein liður í eini bygnaðarbroyting, har víðkaðar heilsutænastur verða veittar á m.a. heilsudeplum. Endamálið er skjót og góð heilsubót og fyribyrging móti kostnaðarmiklum tungum sjúkragongdum á sjúkrahúsunum. Um hetta eydnast, verður spennandi at síggja, men málið er gott og greitt, sigur hann.
– Ein liður í hesum arbeiði er at seta fleiri kommunulæknar í starv. Í fleiri ár hevur verið víst á, at ov fáir kommunulæknar eru í Føroyum, og fólkatalið er nógv vaksið seinastuárini.
– Fyri at fáa at vita, hvussu langt Heilsumálaráðið saman við kommununum er komið við hesum málinum, verður hesin fyrispurningur settur, sigur løgtingsmaðurin hjá Javnaðarflokkinum.
