Danmark er av álvara aftur í altjóða Melodi Grand Prix.
Danska Eurovision-vónin í ár, Søren Torpegaard Lund, hevur kvalifiserað seg til stóru finaluna í annaðkvøld við sanginum "Før vi går hjem" í Wiener Stadthalle í eysturríkska høvuðsstaðnum Wien.
– We did it (vit kláraðu tað, red.), rópti Søren Torpegaard Lund.
Hetta er fyrstu ferð í 29 ár - síðan Kølig Kaj sang "Stemmen i mit liv" - at ein dansktmæltur sangur sleppur í finaluna.
Tað er greitt, eftir at atkvøðurnar hjá hyggjarunum og yrkisdómsnevndunum eru lagdar saman.
27 ára gamli tónleikaleikarin skal sostatt royna at syngja Eurovision sigurin fyri Danmark fyri fjórðu ferð í søguni.
– Vit síggjast leygardagin! Vit eru til reiðar, vissar Søren Torpegaard Lund.
Tað var Bulgaria, sum setti dám á hálvfinaluna hósdagin, og tað var við einum braki.
Eftir fýra ára fráveru er landið aftur í Eurovisiónini og markeraði sítt comeback við bombastiska Balkan-íblásta nummarinum "Banagaranga", sum sangarinnan Dara onkuntíð rappaði seg ígjøgnum.
Noreg var seinasti á pallinum á kvøldinum.
Jonas Lovv fór á pallin við einum showi, sum var tónað niður í mun til tað, sum hann faktiskt hevði við sær til Wien.
Norra hevði áður fingið eina almenna ávaring frá fyriskiparanum av Eurovision, European Broadcasting Union (EBU), tí sendingin var "ov sexy" og innihelt ov nógvar kynsligar snúningar sum at nerta við skrevið og jockey-rørslur, varð sagt.
Framførslan var tó ikki heilt løgd til viks í mun til upprunan, og enn vóru fleiri Michael Jackson- og Elvis Presley-líknandi stig á leiðini.
Rumenia hevur eisini verið fyri atfinningum. Men tað hevur ikki elvt til nakra ávaring, hóast teksturin til landsins Eurovision-sang, "Choke Me", hevur verið umrøddur.
Sangurin, sum kann umsetast sum "kval meg" á føroyskum, hevði verið ákærdur fyri at glamorisera kvaling. Men sangarinnan Alexandra Căpitănescu mátti síðani lýsa, at sangurin ikki skuldi skiljast bókstaviliga, men ímyndarliga sum ein metaforur fyri innanhýsis trýst.
Nú ársins seinna hálvfinala varð avgreidd í gjárkvøldið, er finaluvøllurin í Eurovision nú funnin.
Tey fyrstu tíggju londini spældu seg víðari í hálvfinaluni týsdagin. Eftir hálvfinaluna í gjárkvøldið koma tíggju afturat við í finaluna leygardagin, har tað í ár eru 25 tjóðir, sum fara at stríðast fyri sigrinum.
Seks lond hava sjálvvirkandi kvalifiserað seg: Italia, Týskland, Bretland, Spania og Frakland, tí tey gjalda størsta partin av gjaldinum, eins og vinnarin í fjør, sum hesaferð er Eysturríki.
Spania hevur eins og Niðurlond, Slovenia, Írland og Ísland boykottað ársins Grand Prix orsakað av menniskjaligu avleiðingunum av álopinum hjá Ísrael í Gaza, sum varð sett í verk eftir álopið hjá hernaðarbólkinum Hamas á Ísrael í 2023.
Danmark hevur tríggjar ferðir vunnið altjóða Melodi Grand Prix: í 1963 við "Dansevise" hjá Grethe & Jørgen Ingmann, í 2000 við " Fly on the Wings of Love" hjá Brødrene Olsen og í 2013 við "Only Teardrops" hjá Emmelie de Forest.
Í annaðkvøld skal Søren Torpegaard Lund royna at syngja fjórða sigurin til Danmarkar.
/Ritzau/
