Tað endaði við 3-1 sigri til gestirnar, tá ið EB/Streymur í góðum líkindum í kvøld í Hólmanum á Eiði hevði vitjan av NSÍ.
Hálvleiksstøðan var 2-1, og hetta var níggjunda ferðin á rað, at NSÍ fór av vøllinum við úrtøku.
31. mai tapti NSÍ 3-2 í Klaksvík. Síðani tá hava teir gulu og svørtu tríggjar ferðir spælt javnt, og í kvøld vunnu teir fyri sættu ferð í tríggjar mánaðir. Hetta var triði NSÍ sigurin í ár ímóti EB/Streymi. NSÍ hevur fyrr í ár vunnið 5-0 í Hólmanum og 4-0 á heimavølli.
-Vit taptu 3-1 í kvøld, og tað sigur okkum, at NSÍ eigur eitt gott lið, og at vit eru nærri teirra liði nú, enn vit hava verið fyrr í ár. Í fyrra hálvleiki skoraðu teir eftir innlegg og horna úr høgru, og tað eru vit ikki glaðir fyri, og triðja málið skoraðu teir ikki, fyrrenn vanliga leiktíðin var væl og virðiliga farin, so dysturin var á lívi inntil síðsta bríksl, staðfestir Sigfríður S. Clementsen venjari hjá EB/Streymi í samrøðu við FM1 útvarpið, og hann heldur fram:
-Hóast vit taptu, so kann eg ikki annað enn vera nøgdur við avrikið hjá okkara monnum, sum vístu fínan hugburð og vóru raskir. Búi Egilsson og Gutti Dahl-Olsen arbeiddu væl har frammi og megnaðu at pressa verjuna hjá NSÍ.
Nýggjur í málinum hjá EB/Streymi var Jónas á Hædd, sum avloysti Jóannes Davidsen, ið annars hevur verið fastur maður millum stólparnar. Hann var ikki tøkur í kvøld.
Tað var eftir innlegg úr høgru frá Jann J. Benjaminsen, at NSÍ setti hol á. Málskjútti út stuttari fjarstøðu var Michal Przybulski. Tá var í 12. minutti, og seks minuttir seinni javnaði heimaliðið, tá ið talan var um fyrsta málmøguleikan hjá EB/Streymi. Mórits Heini Mortensen legði við horna innfyri úr høgru, og liðformaðurin Andras Ó. Olsen var knappur og setti krúllin undir bóltin, sum fór í málið.
Ein lítil hálvur tími var farin, tá ið NSÍ legði seg á odda eftir horna úr høgru. Miðverjin Daniel Obbekjær setti bóltin í málið eftir horna frá Aron Knudsen, og í síðsta minutti var tað Jasper Van Der Hyden, sum staðfesti 3-1 sigurin við rimmar langskoti.
-Í fyrra hálvleiki vóru vit greitt omaná. Tá pressaðu vit teir langt aftur, og tá áttu vit at havt skorað fleiri mál og harvið tikið spenningin burtur. Nú var tað bara eitt mál á muni, inntil vanliga tíðin var farin, og tá verður tað eitt sindur hektiskt. Nú eru vit fegnir um, at tað eydnaðist at vinna øll stigini. Hvussu langt hetta fer at røkka, fáa vit at síggja. Vit hava fokus á næsta dysti, sum verður á heimavølli ímóti TB, sigur Aron Knudsen hjá NSÍ.
Sigurin ber við sær, at NSÍ hevur 48 stig. Tað eru fimm stig fram til KÍ, sum hevur spælt tveir dystir færri enn NSÍ, og sum seinnapartin í morgin fer at spæla á Vágseiði, og tað eru trý stig aftur til HB, sum seinnapartin í morgin fer at spæla í Trongisvági.
EB/Streymur – NSÍ 1-3 (1-2)
0-1: Michal Przybylski 12.
1-1: Andras Ó. Olsen 18.
1-2: Daniel Obbekjær 29.
1-3: Jasper Van Der Heyden 91.+
Dómari: Eiler Rasmussen
EB/Streymur: Jónas á Hædd – Meinhard Geyti, Mikkjal Hellisá, Andras Ó. Olsen, Símun Kalsø, Virgar Jónsson – Thomas Bjørn Miezan, Mórits Heini Mortensen, Tóki H. Johannesen, Gutti Dahl-Olsen – Búi Egilsson
NSÍ: Kristian Joensen – Jann J. Benjaminse, Lars Markmanrud, Daniel Obbekjær, Fabian Ness – Emil Weihe Joensen, Brandur Hendriksson Olsen, Michal Przybylski – Jasper Van Der Heyden, Klæmint A. Olsen, Aron Knudsen
