Stóran part av kappingarárinum sá tað út til, at B36 liðið var á veg ímóti niðurflyting. Við 2-1 sigri í Klaksvík í kvøld lyfti B36 seg at vera røttu megin niðurflytingarstrikuna. B36 og NSÍ hava 18 stig,men málmunurin hjá B36 er betri, enn hann er hjá NSÍ
Liðið hjá Tór-Ingar Akselsen hevur av álvara fingið vind í seglini. B36 hevur 18 stig, og átta tær seinastu ferðirnar hevur úrtøkan verið 14 stig. Seks av teimum eru vunnin ímóti KÍ. Heimatapið ímóti B36 í kvøld ber við sær, at KÍ aftur er í nánd av niðurflytingarstrikuni. KÍ er á sjeynda plássi við 20 stigum.
Eitt stórt korter var farið, tá ið Andri Benjaminsen legði KÍ á odda. Hetta var fyrsta málið hjá fyrrverandi NSÍ og B68 spælaranum, síðani hann í summar fór at spæla við KÍ.
Eitt korter seinni javnaði B36 til 1-1. Málskjútti var 15 ára gamli Dennis Anghel, sum fyri aðru ferð var málskjútti í næstbestu deildini.
Miðskeiðis í seinna hálvleiki var tað 16 ára gamli Dávid Høgnason Viderø, sum skoraði 2-1 sigursmálið hjá B36. Hetta var áttanda málið hjá Dávidi, sum nú hevur skorað tríggjar ferðir á rað.
13. september fer B36 at spæla á heimavølli ímóti botnliðnum 07 Vestur.
14. september fer KÍ at spæla á útivølli ímóti toppliðnum Skála.
