Rúmdarfelagið SpaceX sendi mega-rakettina Starship upp mikukvøldið.
Tað siga tíðindastovurnar Reuters og AFP frá.
Klokkan 00:36 okkara tíð lyfti rakettskipanin seg av uppsendingarplássinum í Boca Chica, sum liggur í amerikanska statinum Texas.
Rakettskipanin er í tveimum pørtum - eitt ómannað rúmdarfar ovast, sum eins og øll skipanin eitur Starship, og ein boosterrakett, sum er gjørd til at kunna lenda aftur og endurnýtast.
Umleið hálvan tíma eftir uppsendingina, sum er níggjunda royndin av rakettskipanini, misti rúmdarfelagið tamarhaldið á rúmdarfarinum, sum fór at snúra seg um seg sjálvt í rúmdini.
Undir sending av útsjótingini frá SpaceX varð eisini greitt frá, at rúmdarfarið lak brennievni.
Farið er síðani komið aftur í lofthavið á jørðini, men SpaceX hevur ikki samband við tað longur.
- Bara fyri at staðfesta, so mistu vit sambandið fyri nøkrum fáum minuttum síðani. Tað merkir, at níggjunda royndarflúgvingin nú er av, sigur Dan Huot, samskiftisleiðari hjá SpaceX, sambært AFP.
Hann metir, at eldur fer at koma í farið, áðrenn tað dettur í Indiska Havið.
SpaceX hevði gjørt fleiri ábøtur á rakettina, eftir at hon brast og brotnaði undir tveimum undanfarnum royndarútsendingum í ár.
Hesaferð megnaði fúmdarskipið at røkka longur út í rúmdina enn undir teimum báðum seinastu royndunum.
Málið er, at Starship skal vera fult endurnýtsluført. 123 metrar høga rakettin skal kunna brúkast til at senda fylgisveinar upp við.
Ætlanin er eisini, at Starship-skipanin skal brúkast av amerikansku rúmdarfyrisitingini, Nasa, til at fáa astronautar til Mánan fyri fyrstu ferð síðani 1972. Hetta skal henda sum liður í Artemis III-uppgávuni.
Rakettin hevur eisini ein týðandi leiklut í ætlanunum hjá stovnaranum av SpaceX, Elon Musk, um at kolonisera Mars.
/Ritzau/
