Hetta kunnu vera seinastu stigini í samráðingunum um frið í Ukraina.
Tað segði amerikanski forsetin, Donald Trump, í dag á veg á fund við ukrainska forsetan, Volodymyr Zelenskij í Mar-a-Lago í Florida.
– Eg haldi, at vit eru komin í endaliga umfarið í samráðingunum, sigur Trump, men leggur samstundis dent á, at ongar trygdir eru fyri, at tað verður væl eydnað.
– Tað fer antin at enda, ella heldur tað fram leingi, og fleiri milliónir fólk verða dripin, sigur Trump.
Fundurin millum Zelensky og Trump í dag fer millum annað at snúgva seg um eina nýggja 20-punktsætlan.
– Vit fáa grundarlag fyri eini avtalu, sigur Trump.
– Tað er gott fyri Ukraina. Tað er gott fyri øll. Tað er sera umráðandi, sigur forsetin.
Trump sigur, at hann heldur, at bæði Zelensky og russiski forsetin, Vladimir Putin, taka friðartilgongdina í álvara.
Trump kallar samráðingarnar bæði fyri "fløktar" og "ikki so fløktar" og afturvísir, at ein freist skal vera fyri, nær tær skulu vera lidnar.
Undan fundinum hevur fokus verið á, hvørjar trygdarváttanir Ukraina kundi fingið sum liður í eini friðaravtalu. Trump sigur, at enn er ikki greitt, hvussu ein slík trygdaravtala fer at síggja út. Men tað verður ein, sigur forsetin.
– Avtala verður um trygd. Tað verður ein sterk avtala, sigur Donald Trump, forseti, meðan hann stendur við síðuna av ukrainska forsetanum.
– Og evropisku londini eru nógv við í tí. Tey fara at vera sera við í verju o.s.fr. Men evropisku londini hava klárað seg ordiliga væl. Tey eru sera nógv í tráð við hendan fundin.
Samstundis takkar Zelensky amerikanska forsetanum fyri fundin og sigur, at hann vónar, at samráðingarnar fara at føra til frið sum skjótast.
Tað hevur verið greitt undan fundinum, at Trump og Zelensky væntandi fara at ringja til evropeiskar stats- og stjórnarleiðarar á leiðini.
##med2##
Undan fundinum hevði Trump eitt samrøðu við russiska forsetan, Vladimir Putin. Trump samrøðuna hava verið "sera produktiva". Sambært einum ráðgeva hjá Putin vardi hon yvir ein tíma.
– Eg ringi aftur til Putin eftir fundin, og vit halda fram við samráðingunum, sigur Trump.
Fundurin millum Trump og Zelensky hevur verið evnið fyri nógvum fokus, eisini eftir at ein fundur í februar millum teir báðar fór heilt av kós og endaði við einum almennum keglaríi.
Mánaðirnir fram til hendan fundin hava verið merktir av fleiri friðaruppskotum.
Fyrst kom eitt 28-punkts uppskot, ið sum heild varð mett at vera sera rúmligt mótvegis Russlandi, og seinast eitt 20-punkts uppskot, sum sambært Zelensky kundi vera grundarlagið undir eini avtalu. Ukraina hevur sagt, at spurningurin um land framvegis er tann torførasti.
/Ritzau/
