Tá man kemur inn í festivaløkið á G!, er fyrsti básurin, man sær, básurin hjá hjálparfelagsskapinum Mirjam. Her eru taskur, oyralokkar, sandalir og annað. Felags fyri alt er, at alt er gjørt í Kenya og Liberia.
Í básinum standa Krista Hvannastein og Bodil Jóanesardóttir, sum umboða Mirjam á G! festivalinum.
Hesin hjálparfelagsskapurin arbeiðir í Liberia og Kenya.
– Vit hava stuðlar í Føroyum, sum millum annað hjálpa børnum, so tey sleppa í skúla. Vit hava eisini Mirjam-kvinnur, har man hjálpir kvinnum við arbeiði, so tær kunnu lívbjarga sær og sínari familiu, greiðir Krista Hvannastein frá
– Í Liberia hava vit eisini seymiskúla, sum er í bygging. Tað er alt stuðlað úr Føroyum. Fólk stuðla verkætlanum og børnum við mati, skúlabøkrum og øðrum, fortelur hon.
Fleiri av hesum taskunum eru gjørdar í hesum seymiskúlanum í Liberia.
– Vit eru ofta paff av, at so nógvir føroyingar vilja hjálpa. Vit leggja merki til stóran áhuga frá fólki, tá tey koma framvið okkara bási. Tað er ordiliga stuttligt.
