Bretland fer at stuðla útgerð til at rudda minur, jagaraflogfør og krígsskip til eina altjóða uppgávu at tryggja farleið gjøgnum Hormuzsundið.
Tað upplýsti John Healey, verjumálaráðharri, týsdagin.
Bretska íkastið fevnir eisini um framkomnar anti-dronuskipanir.
Tilsamans eru 115 milliónir pund sett av frá bretskari síðu. Tað svarar til stívliga 730 milliónir krónur.
Healey boðaði frá hesum eftir ein fund við verjumálaráðharrar úr 40 londum um støðuna í og kring týðandi sundið.
Uppgávan verður sett í verk "tá umstøðurnar loyva tí", stendur í tíðindaskrivi frá bretska verjumálaráðnum.
– Saman við okkara sameindu verður hendan fleirtjóða missiónin vera verjukend, óheft og trúverd, sigur Healey í tíðindaskrivinum.
Krígsskipið HMS "Dragon", sum Bretland sendir til Miðeystur, er longu á veg hagar, upplýsir bretska verjumálaráðið.
Stríðið við Iran hevur avmarkað ferðsluna gjøgnum Hormuzsundið nógv, órógvað oljuútflutningin og sent orkuprísirnar í loft.
Umleið ein fimtingur av heimsins olju fer gjøgnum sundið.
Bretland hevur longu fleiri enn 1.000 hermenn og annað starvsfólk, sum eru stødd í økinum sum liður í verandi verjuátøkum.
Í Danmark gav uttanríkispolitiska nevndin fyrr týsdagin grønt ljós til, at Danmark skuldi lova hernaðarligan stuðul til eitt átak í Hormuzsundinum.
Tað boða virkandi uttanríkisráðharrin Lars Løkke Rasmussen og virkandi verjumálaráðharrin Troels Lund Poulsen frá eftir fund í nevndini.
Hvørgin teirra gav nakrar serligar upplýsingar um, hvat ein danskur stuðul kundi vera samansettur av.
Iran stongdi Hormuzsundið nakrar dagar eftir, at USA og Ísrael gjørdu umfatandi loftálop móti landinum 28. februar.
/Ritzau/
