Fert tú á ólavsøku?
- Ja, tað er ein sjálvfylgja. Minnist ikki, nær eg seinast havi verið burtur á ólavsøku.
Tað sigur Tórður Mikkelsen.
- Fyri meg er ólavsøkan eitt hæddarpunkt av árinum. Havi nú í mong ár arbeitt fyri Kringvarpið í sambandi við setanina ólavsøkuaftan og eisini í sambandi við gudstænastuna ólavsøkumorgun, skrúðgonguna og sangin undir Tinghúsinum.
Hvat heldur tú er tað besta við tjóðarhátíðini?
- Haldi, at tað er eitt serligt huglag á ólavsøku. At hitta fólk, bæði føroyingar og útlendingar, er áhugavert, og á ólavsøku hitti eg altíð fólk, eg ikki havi sæð í mong ár. At nógv fólk eru í føroyskum klæðum, setir serligan dám á.
Tórður Mikkelsen heldur, at gudstænastan ólavsøkumorgun, skrúðgongan og kórsangurin á Tinghúsvøllinum eru kjarnin í ólavsøkuni.
##med2##
Er okkurt, tú saknar við ólavsøkuni?
- Veit ikki. Men kanska fleiri siðbundin tiltøk. Eitt gott tiltak hesi síðstu árini hevur eitt nú verið felagssangurin við harmonikuspæli umborð á træseglskipunum, sum liggja við kai við Skeiva Pakkhús á Skálatrøð.
Minnist tú onkra ólavsøku fram um aðrar?
- Á hvørjum ári havi eg serligar upplivingar á ólavsøku, so tað er torført at taka nakað fram um annað. Men, eg minnist væl ólavsøkuna fyri nøkrum árum síðan, sum regnaði burtur, sigur Tórður Mikkelsen.
Lesið eisini: Fólk vænta at vit eru heima á ólavsøku
https://www.in.fo/news-detail/folk-vaenta-at-vit-eru-heima-a-olavsoeku
##med3##
##med4##
