Hans er skopuningur, sonur Gullborg, f. Olsen og Kristian Joensen, bæði úr Skopun.
Tá Hans var 13 ára gamal, flutti familjan til Havnar at búgva.
Hann róði út í Grønlandi frá 1967-69 og sigldi við "Baki" hjá Skipafelagnum Føroyar frá 1970-75.
Eftir tað var hann útróðrarmaður í eini trý ár, til hann fekk fast starv á Bacalao í 1978.
Hansara uppgáva er at frysta slógv, sum verður útflutt sum minkafóður.
Hans hevur trivist væl á arbeiðsplássinium - bæði hjá Bacalao og hjá Føroya Fiskavirking. Hann arbeiddi eisini nógv á Bacalao sum ungur, hann var bert 14 ára gamal, tá hann fyrstu ferð arbeiddi har.
Seinasta árið er Hans best kendur sum formaður í Havnar Arbeiðsmannafelag. Hann hevur verið nevndalimur í felagnum í eini seks ár, og 1. februar 2003 bleiv hann valdur til formann.
Í fríløtunum um summarið dámar honum best at fiska laks á Leynavatni. Uttanfyri laksasesongina møtast nakrir av teimum sum fiska laks, einaferð um vikuna, í húsunum hjá Føroya Sílaveiðufelag í Havnardali, har teir spæla kort.
Hans er giftur við Kirstin, f. Eysturtún, úr Havn, tey eiga tríggjar døtur: Joan og Judith, sum búgva í Havn, og Harriet sum býr í Vestmanna.
