Russland vil fyribils ikki loyva amerikonskum vápnaeftirlitsfólki atgongd til sínar støðir, sum tann sonevnda Ein Nýggj Byrjan-avtalan um avdubbing annars loyvir.
Tað sigur russiska uttanríkisráðið í dag sambært tíðindastovuni AFP.
Russland birtir undir, at hetta hevur nakað at gera við tiltøkini hjá vesturheiminum móti landinum.
Tey umfatandi tiltøkini vórðu sett í verk, eftir at Russlandi gjørdi innrás í Ukraina í februar.
Tiltøkini merkja millum annað, at russisk eftirlitsfólk ikki kunnu gera kanningar í USA.
– Russland er tvungið til at taka til slík tiltøk sum úrslit av áhaldandi ynskinum hjá Washington um at gera kanningar, sum ikki taka støði í veruleikanum, sigur russiska uttanríkisráðið sambært AFP.
Samstundis ákærir Russland USA fyri at royna »at skapa einsíðugar fyrimunir« og fyri at taka frá Russlandi »rættin til at gera kanningar á amerikanskari jørð«.
Russiska uttanríkisráðið vísir eisini á útbreiðsluna av koronuvirus í USA sum orsøk til, at vápnaeftirlitið í Russlandi nú steðgar.
Ein Nýggj Byrjan-avrtalan, sum varð sett í gildi í 2011, er tann síðsta avtalan um avdubbing, sum er eftir millum teir báðar fíggindarnar úr kalda krígnum, USA og Russland.
Hon var sett í verk av táverandi forsetunum Barack Obama og Dmitrij Medvedev í 2010.
Hon sigur, at tey bæði londini í mesta lagi mugu hava 1550 kjarnorkuspreingiløðingar hvør í síni tilbúgving.
Harumframt avmarkar hon, hvussu nógvar interkontinentalar rakettir, londini kunnu hava.
Avtalan varð longd við fimm árum, tá hon stóð til at ganga út í fjør. Tað merkir, at tann núverandi avtalan er galdandi til 2026.
Amerikanski forsetin, Joe Biden, mælti í síðstu viku Russlandi til at vísa vilja til at endurnýggja avdubbingaravtaluna, tá hon gongur út um fýra ár.
/ritzau/