Donald Trump sendi helst Iran eini boð, tá ið hann mánanáttina almannakunngjørdi eitt sjónband av einum íspunnum bumbuálopi á iransku oynna Kharg.
Tað sigur amerikanski varaforsetin, J.D. Vance, sambært tíðindastovuni Reuters.
– Forsetanum dámar væl at royna okkurt nýtt á sosialu miðlunum. Hann hevði sjálvur verið tann fyrsti at sagt, at hann ikki boðar frá hernaðarligum atgerðum á sosialu miðlunum, men eg haldi, at hann sendir iranum eini boð, sigur Vance.
Sjónbandið varð lagt út á sosiala miðilin Truth Social saman við einum teksti. Tað er gjørt við vitlíki og vísir tað, sum líkist einum oljureinsiverki og einum skipi, ið verða sprongd í luftina.
Álopið sæst úr erva, sum varð tað tikið upp úr einum flogfari ella einari tyrlu.
– Oyggin Kharg verður sprongd sundur og saman!!! Forseti DJT, stendur í tekstinum til sjónbandið.
„DJT“ eru forbókstavirnir hjá Donald J. Trump.
USA leyp sunnukvøldið á tvær rakettstøðir á iransku oynni Larak. Amerikanski herurin vísir tó aftur, at Kharg varð álopin.
Áðrenn núverandi kríggj varð umleið 90 prosent av allari iranskari oljuútflutning skipað út frá Kharg. Eitt amerikanskt álop á oynna kann tí fáa álvarsligar avleiðingar fyri iranska oljuútflutningin og harvið iranska búskapin.
Tað hevði tó ikki verið fyrstu ferð, at USA leyp á oynna.
Í mars framdi amerikanski herurin eitt umfatandi álop á Kharg. Sambært Trump vórðu øll hernaðarlig mál á oynni løgd í oyði.
Trump segði tá, at USA hevði spart oljuídnaðin á oynni.
Álopini á Larak í nátt vóru tey fyrstu amerikansku álopini á Iran síðan síðst í juli.
Sambært iranskum ríkismiðlum lótu tvey fólk lív, og fleiri onnur vórðu særd í álopunum.
Iranska kollveltingarverjan svaraði aftur við rakett- og dronuálopum á amerikanskar herdeildir í Jordan og Sameindu Arabisku Emiratunum, skrivar tíðindastovan AFP.
Í kvøld er framvegis ógreitt, um nakar hevði fingið skaða í iransku álopunum.
Ritzau
